ისრაელის პოლიციამ რეიდი მოაწყო იერუსალიმში მდებარე სასტუმროს ოთახში, რომელსაც ტელეკომპანია Al Jazeera თავის დე-ფაქტო ოფისად იყენებდა, მას მერე, რაც მთავრობამ გამოსცა გადაწყვეტილება ამ, კატარის მფლობელობაში მყოფ ტელეკომპანიას ადგილზე მუშაობა აეკრძალოს - უთხრეს ისრაელის ოფიციალურმა პირმა და Al Jazeera-დან წყარომ სააგენტო როიტერსს. ინტერნეტში გავრცელებულ ვიდეოჩანაწერში ჩანან სამოქალაქო ტანსაცმელში ჩაცმული ოფიცრები, რომლებიც სასტუმროს ნომერში სატელევიზიო აღჭურვილობას შლიან. Al Jazeera-ის წარმომადგენლის თქმით, სასტუმრო აღმოსავლეთ იერუსალიმში მდებარეობს. პრემიერ-მინისტრ ბენიამინ ნეთანიაჰუს მთავრობამ სატელევიზიო ქსელი დახურა ღაზაში ომის მიმდინარეობის პერიოდში, იმ საბაბით, რომ ტელეკომპანია ეროვნულ უშიშროებას უქმნის საფრთხეს. Al Jazeera ამ ნაბიჯს "დანაშაულებრივ ქმედებას" უწოდებს და ბრალდებას, რომ ტელეკომპანია ისრაელის უშიშროებას უქმნიდა საფრთხეს, უწოდებს სახიფათო და აბსურდულ სიცრუეს, რომელიც მის ჟურნალისტებს აყენებს საფრთხის წინაშე. ტელეკომპანია აცხადებს, რომ უფლებას იტოვებს "გადადგას ყველა იურიდიული ნაბიჯი". Al Jazeera კრიტიკულად აშუქებდა ისრაელის სამხედრო ოპერაციას ღაზაში - საიდანაც ის 24 საათის განმავლობაში მაუწყებლობდა, ომის განმავლობაში. ტელეკომპანიის მუშაობის აკრძალვას კრიტიკულად გამოეხმაურა გაეროს ადამიანის უფლებების სააგენტო. "თავისუფალი და დამოუკიდებელი მედია აუცილებელია გამჭვირვალობის და ანგარიშვალდებულების მისაღწევად. მით უმეტეს ახლა, ღაზიდან მაუწყებლობაზე მოქმედი მკაცრი შეზღუდვების გათვალისწინებით. გამოხატვის თავისუფლება ფუნდამენტური უფლებაა. მთავრობას მოვუწოდებთ გააუქმოს აკრძალვა" - წერს სააგენტო პლატფორმაზე X. ისრაელის პარლამენტმა გასულ თვეში დაამტკიცა კანონი, რომელიც შესაძლებელს ხდის ისრაელში უცხოური მაუწყებლების დროებით დახურვას - მათი, ვინც მიჩნეული იქნება საფრთხის შემქმნელად ეროვნული უშიშროებისთვის. ასევე ნახეთ გაეროს მაღალჩინოსანი: ღაზის ჩრდილოეთში "სრულმასშტაბიანი შიმშილია" ღაზაში ომს ბიძგი მისცა 7 ოქტომბერს სამხრეთ ისრაელზე ჰამასის თავდასხმამ, რომლის დროსაც მძევლად აიყვანეს 253 პირი. ისრაელის მონაცემებით, იერიშს ემსხვერპლა 1200-მდე ადამიანი. ისრაელმა ამას უპასუხა ღაზაზე შეტევით, საჰაერო და სახმელეთო იერიშებით, რასაც, ღაზის ჯანდაცვის უწყების ცნობით, 34 500-ზე მეტი პალესტინელი შეეწირა. პალესტინელებს არ აქვთ საკვები, საწვავი და მედიკამენტები, ისრაელის შეტევის შედეგად შექმნილია მწვავე ჰუმანიტარული კრიზისი, განადგურებულია ტერიტორიის დიდი ნაწილი. ...